2017年2月27日 星期一

組合調動:買入長江基建代替電能(27/2/17)

今次升市突然而來,搞到我做錯左唔少決定, 不過今日所做既決定我相信唔會有大錯:)

先講組合調動: 以64.35買入長江基建1000股, 同時以69.6沽出電能實業1000股
沽出電能錄得帳面虧損3500, 不過計及特別息5000則獲得微利1500
沽出電能買入長建亦能增加Hutchison capital手頭現金5000, 計及特別息5000可動用現金可以增加至28000
惟一缺點在於每年派息將會減少550(2700-2150=550)

這次交易特點在於預防長建電能合併, 上一次電能長建合併議案遭小股東否決, 原因在於1.換股比例低及2.不先派特別息予電能股東

問題2.已經解決, 所有電能股東可以收到每股5元特別息, 倘若相信長建電能再提合併, 但電能經已派發110億特別息, 資產淨值減少, 我認為大公子會以不高於上次的換股比率提出合併, 即不高於1.04/不高於1.066

現在電能/長建之股價比大約是1.08, 與其大公子幫我換, 我認為自行換股(換馬)更好, 以免被長建攤分是次合併收益

當然不合併也有可能, 但我認為合併是遲早的事

2017年2月23日 星期四

新世界發展遲早供股(22/2/17)

今日睇財經新聞話新世界發展今年賺多左31%, 其實新世界發展折讓大, 股息率高, 土地儲備充足, 加上新世界中心今年落成, 原本hutchison也好有興趣購買小量新世界股份, 相信樓市向好能讓新世界盈利上升

賺多左31%就當然要睇下份中期報告, 不過睇完hutchison對新世界發展既好感一下子消失左, 仲好有預感要供股

新世界今年現金由540億增加至680億, 初頭我以為係賣樓賣得順利套現現金, 不過睇真d又唔覺,   因為今年賣樓賣左130億, 舊年就賣左170億... 明明今年賣樓比舊年少, 邊得黎咁多錢呢? (新世界的主要盈利同新地恆地唔同, 賣樓佔多數, 收租+新創建+新百貨只佔1/3左右)

雖然我只係讀過一個會計101的course, 但A=L+OE這條公式我都識, 明明今年賣樓又唔係賺得特別多, 資產方條數又大左咁多, 通常都係借多左錢啦係咪?

原來今期新世界發行左12億美元(約94億港元)5.75%永續債, 由於永續債只還息不還本, 所以計入資產方, 帳面上負債下降(但實際上增加左債務, 非股本權益=負債), 再睇番份balance sheet同埋主要收購方面, 銀行借貸約增加了100億至1250億, 再加上增加左30億非控股權益至240億(優先股?或者其他計落股東權益部分既負債), 前前後後新世界借多左230億, 230-140=90億, 睇番
主要收購我地睇到新世界係深圳投地用左大約100億, 今年條大數大致係咁上下 (當然遲下長沙灣塊地中標要俾多80億, 俾現金/再借錢就下回分解)

其實新世界發展已經比其他三大重債, 舊舊年頭先私有化新世界中國, 今年又借多230億投地起樓, 樓市好就好, 樓市冧左睇怕要問各位股東供番一百幾十億填數(我相信新世界中心既租金收入係鄭家借230億既基礎, 不過一旦經濟唔好租金減少就大煲, 雖然暫時睇cashflow冇大問題), 而鄭家又有錢又奸係人都知, 供股一定唔會係10供1咁濕濕碎, 買得新世界要至少準備多一半錢以防鄭家打劫(最壞打算係2供1), 睇黎買新世界只能透過股數增加, 而非股價升幅獲利:(

我要買都係買番阿仔新創建算數, 地產股買d輕債既好

2017年2月21日 星期二

買入新創建集團(21/2/17)

今日以$14.22買入新創建集團2000股

新創建集團今日公布中期業績, 純利仍較去年有溫和增長, 這令我頗為意外, 因為在人民幤下跌,   港鐵南港島線開通, 以及出售新創建物流中心之後我估計經營溢利會有小幅度下跌, 新創建的表現比我想像中更出色

加上新創建在日前已經償還5億6.5%年息的美元債, 財務利息支出將會減少, 加上港怡醫院今年落成, 我預期醫院以及飛機租賃業務未來幾年都可以作為新創建的增長動力

惟一令人擔心的就只有會展業務, 因為設施管理業務收益已經連續下跌幾年

策略性投資向來係我最討厭的一部分, 唔知點解新創建會揸著一堆蟹股, 年年蝕到媽媽聲都死攬唔放, 不過今年新創建開始賣走新礦資源, 我期望佢可以盡快清走d蟹股套現, 再投資外國基建就最好

雖然今日買入價較高, 買入之前已經有心理準備會有帳面虧損, 不過如果新創建股價下跌至合適水平我仍然會增持, 直至用盡上次套現信和及新創建所得現金為止

2017年2月18日 星期六

東亞銀行業務----如果我係李國寶應該點做? (17/2/17)

雖然東亞銀行(23)我冇乜興趣買銀行股票(主要係條數比較難估), 不過東亞銀行係香港主要銀行之一, 歷史悠久, 其業績有一定意義, 亦可以一定程度反映中港經濟, 所以希望分析一下(小弟未寫過銀行, 可能寫錯野:) 希望各位指點一下)

1. 純利&地區盈利
東亞中國業務可以用垃圾兩個字形容, 蝕到媽媽聲(4.59億) 這是主要因為去年央行多次減息導致凈息差收窄, 加上人民幤貶值以及減值貸款急升所致。不過更令人擔心係東亞中國的客戶存款減少左9.8%至1900億左右, 存款向來係銀行命根, 亦係銀行最穩定及低成本資金來源, 存款基礎收縮將對其凈息差有不良影響(因為要用高息搶存款或者發行債券之類方式籌集資本, 但資金成本將會提高很多)

香港業務都算唔錯(賺接近40億), 在現今經濟環境不明朗之下只係輕微倒退(跌左幾個百份點), 相信這是因為東亞大部分貸款都係借俾地產商同埋小市民供樓, 只要樓市維持平穩, 香港業務唔會有大問題。值得一提的是非利息收入下降, 如果係因為股市唔好導致手續費收少左之類就冇所謂, 如果係因為東亞縮分行網絡, 導致客戶減少使用東亞的服務/客戶數目減少就非常嚴重, 因為會令存款基礎收縮, 再重複一次, 存款向來係銀行命根!!! 不過暫時冇明顯跡象客戶數目減少, 我覺得東亞香港業務相當有價值(相信國浩係想買東亞香港業務先至買咁多東亞股票)

海外業務(新加坡, 馬來西亞納閩, 英國, 美國)相信出色, 盈利增加大約10%至12.9億, 相信同不少內地人希望投資海外有關, 美國經濟𨍭好亦有助東亞海外業務, 東亞的外資背景比起其他內地銀行有優勢(希望投資海外的內地人士可能更相信東亞的跨境網絡) 相信未來東亞會持續擴張其海外業務, 利用其跨境網絡幫助內地人投資海外

2. 銀行穩健性
一級股權比率微跌0.1%至12.1%, 雖然不及恆生穩健, 但仍然可以接受
但貸存比率由75.6%升至80%令人憂慮, 因為這表示銀行正在使用更大的槓桿賺取息差收入(相信係因為美國加息很慢, 以及很多銀行爭相向大企業e.g.新地, 長和等放貸, 搶優質貸款導致息差收窄; 倘若息差收窄則導致銀行要更進取放貸, 擴大貸款規模以維持息差收入)
一旦出現流動性緊縮(股災, 中小型銀行/證券行倒閉等等金融危機時)東亞的處境會變得更危險, 倘若發生擠提就冇邊個救到東亞, 貸存比率上升係東亞要改善的地方, 因為貸存比率去得太盡會導致流動性風險增加

3. 如果我係李國寶應該點做
3.1.由於中國實體經濟(工商零售業等等)變差, 但央行維持寬鬆貨幣政策, 資金持續流入股樓債市, 我會試下減少對工廠, 酒店,零售商的貸款, 轉向投資優質企業債券以及向有穩定收入的公用企業貸款, 希望減少不良貸款比率

3.2. 繼續爭取向優質藍籌公司(e.g.長和, 新地等)放貸, 必要時可以減低貸款利率(不惜淨息差收窄, 希望求得穩定貸款, 這些貸款在經濟不景時亦可以向其他銀行出售, 相信在利率低企環境這些貸款組合仍然有人接貨)

3.3. 維持香港零售/個人銀行業務:維持存款規模(確保低資金成本來源), 維持穩定的非利息收入以及追求按揭貸款的穩定收入

3.4. 必要時發行企業債券, 趁利息仍然低企發債, 增加銀行流動性; 倘若未來美國加息時發債將增加東亞發債的利息成本
P.S. 不建議供股, 因為李家的持股量不足, 供股有機會使國浩以低價增持東亞股票

3.5. 處理行址/物業/附屬公司以釋放資本
配合東亞中國分行規模收縮, 我認為東亞只需要在北上廣深, 以及重慶長沙武漢等十數個城市設置分行即可, 其他分行可以裁減, 這可以讓東亞賣出空置的大陸地產物業以及縮減人手降低成本

香港分行可以酌量裁減, 但我希望維持一定規模(以維持客戶及存款基礎)

附屬公司東亞已經出售東盛控股及卓佳, 但我認為領達財務及藍十字保險可以出售以釋放資本, 財務公司雖然利率較高但收入不算穩定安全, 我認為可以視為非核心業務出售; 藍十字保險出售之後, 東亞可以向友邦/保誠等大型保險公司訂定協議, 收取若干費用幫助它們推銷保險產品(參考星展銀行的做法), 相信東亞的銷售網絡會引起友邦/保誠/宏利的興趣

3.6. 擴展東亞中國的非收息收入業務(重點在於資產管理服務)
在一線城市分行研究推出更多外幣計價產品(外國債券, 美元計價基金等等, 迎合內地人投資海外需求)

如果我係李國寶我會做呢6樣野, 希望東亞唔使賣盤, 一個百年家族搞成咁令人傷感, 身為香港人, 我仍然希望東亞可以維持其華資身份, 而非中資/外資銀行







2017年2月16日 星期四

[不理想的交易]買入數碼通(315) (15/2/17)

今日hutchison同埋屋企人分別以$10.9的價錢買入數碼通(315)(各自買入2500股), 資金來自上次沽出信和之後的多餘現金

由於電能(6)的特別息以及我同屋企人持有的股票, 好像長建(1038), 希慎(14)都即將公布業績及派息, 大量閒置現金需要尋找投資機會, 本來希望過左業績期再擇優而買, 但近日市場亢奮, 如果再等待多一兩個月可能股市已經升得不合理地高, 到時即使公司業績良好也買唔落手:(

數碼通(315)聽日出業績, 倘若今年可以維持以往派息(27+33=60仙/股), 息率>5%, 況且數碼通(315)處於浄現金水平, 比起其他電訊股如電盈(8), 和電(215), HKBN(1310), HKT(6823)坐得安心一點(當然HKT更高息率, 此乃數碼通之缺點)

希望今次沒有做錯決定:)

2017年2月3日 星期五

組合變動(3/2/17)

今日以$14.04出售所有新創建集團股份(合共4000股), 帳面獲利$5600。

由於出售新創建之後我只剩下電能實業, 持倉實在太少, 所以動用出售新創建所得的資金買入6000股置富REIT(買入價9.07), 置富REIT現在的價錢算不上太便宜, 但勝在業績穩定, 可以提供穩定分派。況且置富REIT將會於一星期後除淨, 相信這次的換馬行動效果不會太差:)

P.S. 可以從股市中提取資金有1.股價差= (14.04x4000 - 9.07x6000) = 1740, 2.再加上置富REIT股息= 0.2445x6000= 1467, 合共約3000左右; 而由於置富REIT比新創建更高息, 我相信這個換馬動作能增加每年派息:)