2017年5月13日 星期六

關於市場先生封筆的感想(12/5/17)

近日blog界的大事應該係市場先生封筆, 我記得當年認識市場先生係我在google search 合和實業(54)的資料以及股票分析文章時無意睇到佢個blog, 之後一直都有去睇佢寫折讓股, 相信不少blog友同我一樣都從市場先生身上學左唔少野

不過最近呢隻香港建設(190)我就覺得好奇怪, 根本唔似佢之前的選股風格, 原本想話去佢個blog問野結果得罪埋佢, 可能我用字唔小心啦(真係冇挑機既意思, 認識hutchison的人都知我甚少批評其他blogger), 因為你見佢之前寫過/佢個價值組合入面既折讓股, 好像合和(54), 永泰(369), 英皇國際(169), 廖創興(194)等等, 除左折讓大之外(PB低於0.5), 股息率通常都很高(>4厘息), 同埋已經很多年冇供股合股紀錄, 雖然呢d野成交較少, 但大家跟佢買呢d都應該幾安全下, 最多唔升咪收息囉, 如果呢d股升到較高水平又可以換馬至會德豐, 嘉里等仍有一定折讓的大地產股, 基本上呢個買法好安全, 升就賺價, 唔升就食息(折讓深的地產股有一定安全邊際), 但今次寫隻香港建設就真係R矖頭, 感覺上完全好似係另一個人寫咁

香港建設(190)初步睇PB0.24(Google search到), 折讓大, 但股息率得1.5%, 萬一買左之後三幾年股價唔升已經係對投資者好大懲罰(1.5%連通脹率都冇啦), 即係買得190本身就係搏爆升賺錢, 要搏股價爆升, 通常不外乎大股東私有化, 賣盤, 又或者係公司出售大量物業資產之後大派特別股息之類, 呢d野本身就係奇貨可居, 投資者要用低價收集大量股票再等消息, 而等幾耐就睇大股東幾時做野

但買呢d股,大股東想玩你好容易, 基本上睇佢心情, 近日最傷的股票例子就有1097有線, 原本好多散户(包括hutchison現實世界的一個朋友)買左1097, 佢地認為免費電視牌照奇貨可居, 想話搏升幅, 結果純官一招三供五就... 因為上市公司大股東的財力和散戶不可同日而語, 呢d細股市值咁細, 當190個大股東想整走你地班小股東, 佢可以折讓n成一供一之類做你世界, 而講緊可以佢只需要用十億八億就得, 我地作為散戶, 買番d大大少既, 即使買著新世界呢d, 當新世界三供一, 鄭家而家供股都要用起碼一百幾十億, 至少我可以make sure大股東唔會亂黎(至少唔會供股供到三供五之類咁過份), 合和永泰惠記呢類雖然市值較細, 但至少有其他基金/投資者幫你監察大股東(合和有基金股東, 永泰有新地, 惠記有新創建), 但香港建設印象中冇呢類投資者, 我好難make sure大股東有良心喎(換轉如果你係大股東供下股趕人落車就可以賺多十億八億, 你做唔做先?)

雖然190大股東一直都有keep著派息, 我地難保佢養兵千日用在一朝, 而市場先生雖然話冇推姐, 你搞個擂台班之後blog界已經咁多人(包括埋我)講呢野, 如果有人因為呢隻野輸錢(責任一定係佢地到), 但肯定對市場先生名聲有損, 或者應該話你提及呢隻野係瓜田李下, 惹人疑心

其實市場先生日後集中玩呢d高風險野, 封筆也不算壞事, 不過我希望佢可以保留個blog, 佢之前分析既股票如合和一類的確很有價值

希望寫呢篇文唔會令我得罪人啦




36 則留言:

  1. 呢隻嘢見佢有虧損紀錄,首先必要有戒心。
    更何況除非你真係好熟佢D資產,但講真香港投資者有幾多熟國內的資產。
    好似香港都叫勉強熟悉少少。

    回覆刪除
    回覆
    1. 唔識睇, 除了帳面平之外睇唔到其他野

      刪除
  2. 呢隻基本上無咩基本因素可言,純粹就便宜
    這類股每日成交很少,無可否認經先生一講會更易炒起,他的文章很多大陸人看

    回覆刪除
    回覆
    1. 所以近日190升左, 我唔熟呢d大折讓股, 如果一定要搏一隻可能我會試下爪哇控股(251), 不過一定冇190咁平(當然我都唔會買251, 190就更加唔會)

      刪除
  3. 你寫這篇不會得罪人,只係顯露筆者的小家
    請自尊的同時,也懂得尊重別人

    只會路過一次的人上

    回覆刪除
    回覆
    1. 我根本沒有挑戰市場先生的意思, 如果我唔尊重佢既話我既措詞唔會咁保守客氣

      你匿名留言踩我主場, 而家係邊個小家邊個唔尊重人?
      請自尊的同時, 也懂得尊重別人

      刪除
  4. 沒有仔細看這股, 估不到連續出現在不少blog中...

    其他東西便不置評. 但我是看不出hutchison有不尊重市場先生的地方, 只是一些理性討論. 不過當事人會錯意也說不定.

    個人而言, 供股不一定是老千股, 要看情況. 但3供5呢d....再加埋其他data, 以防萬一, 一定不會買...

    回覆刪除
    回覆
    1. 只是覺得這隻同之前寫果d好唔同,所以有疑問

      刪除
  5. 從他們提及的股票,估計街市和法國先生已埋班,如果你想像他們是小魚之類就明白,如果不是「身有屎」,其實他們是無需動怒的!你見街市先生的支持者都是匿名先生便可知一二!

    回覆刪除
  6. 市場先生自2007之前狂推5號到後其冇再提就知咩事啦,次次入完货就吹。
    以前都推D 大股,後尾愈推愈细,愈推愈千。
    冇睇9世,唔想幫人做墊底。

    依家退出又搞埋D投资課程,我睇係明退實進喎。

    回覆刪除
    回覆
    1. 咁5號佢又推唔起既, 咁鬼大隻, 正如我成日叫人買長江基建同新創建長揸姐, 我地d散戶對大股冇乜影響力, 不過太細就唔好掂, 容易出事

      刪除
    2. 或者你果時未出身,阿先生果時出左两本書,話自己要儲10万股,佢仲有個永不沽出组合(但深信已沽哂)

      刪除
    3. 我也有買那兩本書而且深受他影響,現在只能説寫blog者已不是他本人,否則很難解釋!

      刪除
    4. 如果要懷疑,從佢呢幾年推介莊子中國,川流集團時已經唔係佢,以前既佢比較似東尼的。

      刪除
  7. 實在睇唔出小伙子兄的請教講左D咩野要得罪人的地方, 反而是有人此地無銀三百, 莫名其妙地放狗咬人~

    回覆刪除
    回覆
    1. 佢太多粉絲了, 有時講野再小心都避免不了被人攻擊

      刪除
  8. 呢隻野我都損左DD 手, 佢之前係老千股但之後好似轉左主席後就似乎正常番D, 佢未來係上海有兩揀野落成, 呢個可能係佢折讓大的地方..anyway我最後都係睇唔清放左...

    btw我都覺得和記兄只係理性討論, 但我都唔係好敢係網上針對某一Blogger 講太多, 人多口雜, 特別係一D 有大量粉絲的人 :P

    回覆刪除
    回覆
    1. 如果如果d人話市場先生推老千股我就唔同意既, 因為之前佢推合和果d係真正既價值股, 冇呃人既; 不過呢隻190就真係平之外唔覺有咩好, 地產股大把都有折讓, 只要中港樓市持續向上, 我買新世界(17)買永泰(369)買嘉華(173)一樣有得升, 所以我唔覺得需要為左要特登揀平野而犧牲太多基本因素

      刪除
    2. 不過而家再了解多左, 市場先生個策略係要至少買一百幾十隻野先有可觀回報, 佢專登揀d基本因素好差(我意思唔多派息)而又好平既死股去買, 貪呢d野波幅夠大, 例如一隻190當佢PB由0.2收窄折讓到0.4, 之後市場賣出就可以賺100%, 不過呢d死股有可能升幾倍, 又有可能跌幾成, 所以佢要揸住一百幾十隻呢d野先得, 只要一年之內有兩三隻升一兩倍, 基本上可以cover番其他睇錯左既損失

      刪除
    3. 不過我認為呢d野都係唔寫好過寫, 佢d讀者冇乜邊個有錢到可以揸一百幾十隻野(例如我, 根本冇咁多錢, 有都攞黎買樓上車), 如果你買得一兩隻, 大炒既機會就相當大, 同埋佢咁多粉絲, 除非所有粉絲都跟足佢買番一百幾十隻, 如果唔係就好危險, 西諺有one man's meat is another man's poison, d人炒輸股鬧佢推股都有背後原因, 不過我認為唔應該話佢推老千股, 只係佢個方法冇乜人做到

      刪除
    4. 如果佢同佢粉絲認為我亂寫野, 我就冇話可說:)

      刪除
    5. 算吧!我們是不及他的粉絲,剛剛見到不平凡先生的文章,其實他們已成了一個團隊,互相支持,一唱一和,所謂道不同不相為謀,還是看好自己的組合吧!我現在正忙於處理6月底大幅減持股票,也管不了其他人了!

      刪除
    6. 你誤會了我的意思,另外是止凡這篇文章其實乜講錯,我們要對事不對人,不可因人廢言

      刪除
    7. 哈哈哈,容我多言,小弟2012年開始睇不平凡,坦白講,我係2012年甚至一睇睇到佢08-09的文章,很有意思。
      但依家既佢,除左3幅屁就仲有同市場同法國佬喂喂喂,另加個4眼大叔,很久沒睇了!

      刪除
    8. same...我之前都有留意不平凡, 但後尾佢愈來愈少分析股票什至無乜點講投資, 可能已經上岸了吧

      我都同意市場生唔係推老千, 而且佢只係分析邊隻值博, 從來無講過幾錢要止蝕哥D 行野, 可能佢有一D 我地唔知的資訊吧, 又或者佢係靠自己分析所以唔係我地可以完全理解, anyway 買賣的確係自己責任, 我覺得佢無錯, 大家都無錯, 大家自己分析D 資訊岩唔岩自己就好了

      刪除
  9. Student says :

    You are a nice guy.

    Peaceful = Healthy = Rich

    Please share more stocks analysis with us.

    Best wishes.

    回覆刪除
  10. 認同以事論事。機器人也有看過hutchison兄的留言,感覺不出有冒犯的意思。但近來市場先生被人懷疑"推股",看到hutchison兄的"推"字就自然敏感了一點而已。

    另,若果睇Blog睇到出哂陰謀論,真係不如唔好睇。即使別人有陰謀,自己又有沒有獨立思考?

    回覆刪除
    回覆
    1. 機器人兄話陰謀論的意思是指我對大股東有陰謀論還是對市場先生?

      因為港股實在很多老千股,有時多疑一點是必要的,當你見2018呢類藍籌股都出事時,小心為上有其必要

      至於我對市場先生就冇陰謀論,純粹係覺得佢之前寫過的股票同今次好唔同,問又問唔到任何有助我了解呢隻股票既野,所以寫左呢篇文,但你見我下面comment果度有補充番市場先生現在的投資方法及其好處壞處,所以唔存在陰謀論

      刪除
    2. 可能我言辭上令hutchison兄有誤會了。機器人並不覺得hutchison兄認為市場先生有什麼陰謀。

      刪除
    3. 機器人非常認同在投資上要懂得懷疑,懷疑是獨立思考的開始。

      同時,為到言辭上令hutchison兄誤會感到抱歉。機器人從一開始的留言就絕無任何意圖針對hutchison兄,同時機器人也不認為hutchison兄在指控市場先生有陰謀。

      不過有一點,機器人還是必須指出:讀者絕對有權懷疑作者的論點是否正確,但無証據地控訴作者有陰謀就不必要了。但,可惜的是機器人正正見到部分讀者偏偏就是這樣子。

      刪除
  11. 作者已經移除這則留言。

    回覆刪除
  12. 今日190除淨,同時創52週新高。

    回覆刪除