2017年3月23日 星期四

[善意提醒][純觀察純討論] 有關內銀的3個觀點 (23/3/17)

講起內銀呢個問題, 通常會引起唔少爭論, 有部分出名既blogger買落唔少內銀股收息投資, 原因主要係股息高, PE低, ROE比較一般股票高咁樣, 另一邊就有唔少blogger好反對人買內銀既, 佢地會覺得內銀條數做假之類咁樣...

其實hutchison好少買銀行股(惟一一次係開blog之前買HSBC輸過錢咁上下) 咁點要講內銀呢? 主要係內銀股/中資金融股係港股有舉足輕重地位, 加上唔少散戶買得內銀都係長揸收息居多, 兼且買得內銀都係10萬8萬咁買而唔係一手兩手咁小注投資, 所以Hutchison想講番少少內銀希望大家睇完會覺得有用

今次我用point form去寫, 因為我對於內銀認識唔深, 寫唔到一篇完整既文章去闡述我既睇法, 同埋因為我唔熟內銀, 好可能寫錯野, 希望大家可以係樓下留言指正/提出新觀點, hutchison認為有高質討論對大家既投資理念都有好處, 冇brainstorm冇進步:)

1. 暫時黎睇唔少內銀業績(P.S.我只係簡單去睇下業績新聞同埋摘要, 我冇睇過程財務報表) 都有所成長, 不過就資產質素就下降/轉差:

大部分內銀無論在存款及貸款方面都有所増加, 不過浄息差有所收窄同埋減值貸款/不良貸款有所上升, 所以大部分內銀的純利增長都被減值貸款及息差問題抵銷

2. 問題2係由問題1引起既, 因為大部分內銀既資產規模/生息資產規模增大, 直接導致左銀行既一級股權比率(Tier 1 Capital)以及普通股一級股權比率下降, 當然呢個唔係好事, 因為銀行實質上運用既leverge大左, 一旦有較大型金融危機或者流動性緊縮既情況, 我相信唔少銀行都有可能面對流動性風險

P.S. 好多金融比率(尤其係用黎measure銀行資本充足程度既比率)都具有高度一致性, 除左頭先講既Tier 1 Capital, CET1, 仲有流動性覆蓋比率同埋減值貸款覆蓋比率等等, hutchison暫時睇左中信銀行, 盛京銀行同埋一間唔記得左咩名既銀行[唔好意思:-)] 都好似有所下降, 某程度上hutchison可以斷定內銀既經營不及以前穩健

3. 問題3係好多內銀(中信銀行, 盛京銀行, 同埋有幾間出左業績既銀行都係咁樣)為左解決問題2而引發既新問題, 因為hutchison留意到好多內銀有1.發行優先股或者2.增發普通股本或者3.發行可換股債券之類既野
------------------------------------[hutchison認為問題3需要認真看待]-------------------------------------
我相信內銀為左避免資本充足比率下降, 運用増加Equity side既方法去減低金融風險, 呢個動作係合理而且有必要, hutchison唔會有異議, 但每股普通股權益將會攤薄, 相信這對未來每股盈利及派息有不利影響

2017年3月21日 星期二

業績簡評(21/3/17)

今日長江基建, 電能, 恆基, 嘉華都出左業績, 截至今日為止基本上Hutchison 有興趣買既股票都已經派左成績表, 太過詳細我不會寫啦:) (因為我覺得值得買既港股為數不少) 簡單寫下佢地做成點啦

A. 公用股
1. 長建/電能: 英鎊跌所以做得較差, 所以呢d避唔到, 在目前價格而言亦偏貴, 未來一兩年股價及股息未必有太大增長, 不過港股之中主要做海外公用事業就只要佢地, 所以我會keep住佢地, 但唔會再增持

2.中電: 業績派息都令人滿意, 澳洲業務表現令人驚喜, 只要解決埋18年准許回報協議就可以買入擺埋一二邊, 過多十年八年賣左佢用黎上車了 (買股票儲首期唔係隻隻都得, 買中電係ok既, Hutchison 建議冇樓既年輕人可以考慮用中電幫手, 呢隻野唔會輸死人)

3.煤氣: 冇增長, 想買當然可以買少少, 但我覺得買中電較好

4.新創建: 有小幅增長, 未來增長動力在於Goshawk飛機租賃公司, 港怡醫院, 另外周大福企業日前學長和系去澳洲買野, 雖然今次冇新創建份, 但下次有可能預埋新創建一齊玩, 都算係一件好事, 呢間公司穩定性當然及唔上中電煤氣呢d老牌公用股, 但新創建就好似一個發育中既細路, Hutchison希望買夠一定股份之後長坐一段時間, 等新創建小朋友快高長大:)

5. 光大國際: 成長得好快, 大陸股之中呢隻算一線(無論在資產質素或者派息增長方面), 不過可能大陸股大部分都唔好既關係, 大家見到隻比較好既股票就俾左一個好高既價錢佢, 而家都係有得睇冇得買

P.S. 由於hutchison最喜歡公用事業(具壟斷性/獨特業務), 我係用大部分錢去買公用股既, 所以比較關注佢地盤生意做成點, 我認為任何人買股票, 股票組合都應該有部分資金投資公用股, 萬一跌市時呢類股就會發揮定海神針既角色(即使你等錢使都可以蝕本賣少少套現, 唔使擔心冇人接貨)

B. 地產股
呢類股對香港人黎講係重要既, 冇樓/只有一層樓, 又驚樓市再升搞到自己的財富水平同有樓既人越拉越遠, 我地就需要買番d 地產發展股/收租股/REIT 傍身

1a. 九倉, 2b. 會德豐: 相信大家睇過佢地份業績同埋上年年報都知呢兩母子係好野黎, 不過而家已經反映左係股價, 都係有得睇冇得買

2a. 新地, 2b. 恆地: 佢地都比較多收租物業/經常性收入, 所以擺埋一齊睇, 比較多土儲/在建項目係特點, 負債又低, 非常適合買黎擺十年八年幫手上車, 可能hutchison為人貪心, 我要求有3.5厘股息率先考慮買入

3a. 新世界, 3b. 嘉里, 3c. 嘉華: 買佢地比較冒險(收租項目較少, 負債偏高, 主要依靠賣樓), 不過賣點在於估值較上面一堆地產股低, 今年賣樓成績標青, 相信能夠推動股價增長, hutchison比較喜歡嘉里, 今年亦有增加派息, 希望遲下有機會買得到

4a. 信和, 4b. 長實地產(未有業績): 兩位老闆預計將來樓市會大跌? 揸超多現金, 同3a, 3b, 3c佢地相反, 如果你睇淡樓市, 又預期呢兩間公司將來能夠低價買入大量地皮, 可以買佢地既股票入場支持, hutchison較喜歡4a

5a. 太古地產, 5b. 希慎, 5c. 置富REIT, 5d. 領展REIT(未有業績)
收租股的穩定派息令人安心持有, 佢地同公用股一樣都屬於要買定d黎看門口, 5a/5b比較高端, 5c/5d 比較民生, hutchison相信今年零售市道應該平穩(今年業績亦反映這些公司的租金收入有單位數字增長), 如無意外將繼續持有5c

C. 半公用股 (有少少公用股性質但並不完全是公用股, 所以比一般股票估值高, 但比一般公用股估值低)

1. 港鐵: 公用地產股, 未來有不少上蓋項目, 又有收租及車站租務加上交通業務提供穩定收入, hutchison持有少量港鐵, 主要係看中港鐡以上特性, 可以安全地用佢進行地產投機

2. 載通(未有業績): 未來有觀塘地產項目, 加上巴士業務尚算穩定, 又派高息, 希望未來能夠低價補回部分載通股票

3a. HKT 3b. 數碼通 3c.和電 3d. 電盈, 3e.中信國電: 只有高息作為賣點, 很難有增長(3e.除外), 早前以較高價錢買入3b.結果遭受虧損, 個人意見認為3b. > 3a. >3e. >3d. >3c., 3a./3b./3e.可以買入小量, 3d.及3c.則不建議, 尤其是3c.大減派息, 非常不建議(如果跌至7厘股息率或以上當然可以再觀察一下)

Hutchison習慣買股票時用性質相近的股票比較/格價, 不過對於具獨特性質的股票如港鐡就很難使用這方法, 有很多時候造成了出價偏高的毛病, 希望大家睇完之後覺得有用

2017年3月16日 星期四

[盈利警告] 組合調動(15/3/17)

經過商議之後, 今日屋企人以$36.2沽出希慎1000股, 另外以$13.32買入新創建2000股, 套出現金$9560; 出售希慎錄得$350, 惟之前希慎已經除淨, 倘若計及$1090股息, 是次交易錄得$740

由於之前一連串動作失誤, hutchison預計今年的資產組合增長將會十分緩慢, 有必要重新檢視所持股份, 希望未來能夠重拾增長動力

目前Hutchison Capital持股如下:
1. 新創建集團(659) 2000股
2. 長江基建集團(1038) 1000股
3. 數碼通電訊(315) 2500股
4. 置富產業信託 (778) 3000股
5. 港鐵公司(66) 500股

屋企人方面持股如下:
1. 新創建集團(659) 2000股
2. 長江基建集團(1038) 1000股
3. 數碼通電訊(315) 2500股
4. 置富產業信託 (778) 3000股
5. 香港交易所 (388) 100股

目前為止大部分股票都有輕微虧損, 惟收取股息之後能夠抵消部分虧損
以下為未來增長策略:
1. 繼續提高新創建集團(659)的持股, 目標股數為8000股, 不過需要分段增持以避免在股價高位過份買入, hutchison預期仍然會分別增持2次, 每次2000股, 下一次增持範圍應該在$12-$13之間

2. 清理部分股息難以繼續增長之股票, 數碼通電訊及香港交易所可能在未來減持, 惟以目前市況它們股價低殘, hutchison期望能以不低於(成本價x95%)的價錢沽售

3. 鐅於樓市暢旺, hutchison會繼續物色及買入前景明朗, 股息可以増長的地產發展股票

4. 為繼續增加投資組合的股息分派, 倘若能夠保持派息而有5%以上股率的公用基建股票/房地產信託/綜合企業將會繼續增持, 惟需要審視持股之借貸水平, 倘若浄負債比率超過35%則不予考慮

2017年3月10日 星期五

[走寶] 九倉/會德豐 (10/3/17)

其實之前睇過九倉以及會德豐的年報, 知道這兩間公司折讓大, 加上它們將在今明兩年進入物業收成期, 本應買入一些股票, 只可惜當時九倉股價已經升至$50, 會德豐也升至$40, hutchison嫌貴冇上車:(

冇上車結果就越等越升, 睇怕要有大股災才能低價買入九倉/會德豐系股票, 我對九倉/會德豐第三代掌舵人甚有信心, 自佢13年從吳光正先生接手九倉/會德豐地產王國以來, 業績/股息皆有長進, 以富豪子弟而言佢做得有聲有色, 我希望未來的股票組合能夠加入九倉/會德豐作為地產股票方面的旗艦股票(當然要視乎市況及股價), 正如新創建一樣在hutchison capital中擔當重要角色

2017年3月7日 星期二

[香港國企]買入港鐵(66)(7/3/17)

今日以$41.6買入500股港鐵, 這些是早前沽出信和置業之後的最後一筆現金, 相信未來一段時間持股不會再有大幅變動, Hutchison Capital 亦差不多把所有可動用資金用完, 未來要透過收取股息及注資兩種方式提供新資金, 當然我不排除市況大好提供讓Hutchison有出貨機會

買入港鐵之原因有二:
1. 收取特別股息
港鐵將於今年下半年派發特別股息, 連同未期息每股可分發3.02港元, 港鐵每年的經常性收入(剔除地產發展)約100億元, 港鐵市值約2400億, 倘若以經常性收入除以市值100/2400=4.16%
當然這並非十分吸引的回報率, 但如果以港鐵的高穩定性而言, 4.1%我認為也可以接受

2. 地產發展
這個才是港鐵的吸引之處, 港鐵的新盤必定是鐵路盤(這個不用多說), 通常市好市差都可以去貨
以目前的市況對於其他發展商而言並非好事, 雖然賣樓賣得好, 但賣完之後收番d錢都不足以買地補充土儲, 揸住幾百億唔知點算既情況已經在長地, 信置出現, 遲少少亦都會出現在會德豐及新地身上(當然新地有農地土儲, 但作為每年賣400億樓既龍頭發展商, 好快就食曬d土儲, 轉換農地需時甚久, 總不能每年轉幾百萬呎咁快既)
港鐵今年雖然沒有賣樓收入入帳, 但未來黃竹坑, 何文田等地都有新樓盤供應, 相信港鐵能向入標發展商提出更苛刻的條件, 例如提高分紅比率之類, 港鐵股東長遠而言必定能夠分享這份巨大利益