升市不爽跌市快樂 (19/8/17)

hutchison係一個專注投資具穩定收益以及防禦性股票既投資者, 雖然我唔希望有投資者因為股市調整而損兵折將, 但我確實較喜歡跌市多於升市

因為持有防守性股票例如中電之類係升市係相當蝕底既, 有謂"升市莫估頂", 但唔適用於防守性股票。因為中電呢類股票既派息政策以及業績能見度高, 即使好似我地呢d散戶(沒有資訊優勢既投資者)睇年報睇presentation已經估得到未來一兩年間公司既業務做成點, 派息通常都係預期之內。所以大部分投資者(包括散戶)都對呢類股票既估值有一定共識, 呢類股票既特性就係股價穩定, 波幅徧小; 不過有得必有失, 當大家計得到間公司大概值幾錢, 自然而然地你投資係防守性股票既投資表現唔會太高(基於大部分投資者對公司估值及出價接近, 我們好難高賣低買, 有別於其他投資者, 不論係價值型投資者或者趨勢型投資者)

所以買得防守股票, 我地同大市表現已經分道揚鑣

遇上升市, 大部分投資者都應該對呢類防守性股票冇乜興趣, 因為隨便買一隻兩隻popular既股票已經可以一日升一成半成, 抵得上我收成年股息有餘, 有次同朋友食飯談論投資, 佢成日話買呢些(即係我持有的659, 1038等等)一年先收到幾percent股息好慢, 呢個本身係投資防守股票既缺點, 我亦解䆁左我既投資策略俾佢聽, 投資防禦性股票, 本身係不求有功, 但求無過既行為, 當投資市場調整我地就有出手機會

遇上跌市, 很多股票都有很大跌幅, 但防禦性股票既低波幅性保障左我地, 倘若遇到優質投資機會, 我地可以把手上股票賣出套現作出新投資(由於我地d股票跌幅較小, 較小機會出現賤賣資產既不幸事件); 倘若我地沒有新投資機會, 亦可以繼續持有已有股票資產, 反正我地d股票具穩定派息, 甚少出現質素轉差而需要棄子既機會

大市升跌於我而言並不重要, 只係反映投資者對於股票資產既樂觀/悲觀程度, 不過大部分投資者悲觀一點肯定於我有利, 所以惟有黑心一點期待股市下跌了:)